Fréttir

Glófi styður árveknisátak Krabbameinsfélagsins með bleikri línu

Krabbameinsfélag Íslands fékk ánægjulegan liðsstyrk í árlegu árveknisátaki sínu vegna brjóstakrabbameins þegar prjónaframleiðandinn Glófi ehf. hannaði sérstaka bleika vörulínu til styrktar átakinu. Hluti af ágóðanum af sölu hennar rennur beint til Krabbameinsfélagsins.

 „Við rekum tvær prjónaverksmiðjur, eina á Hvolsvelli og aðra á Akureyri og  erum stolt af því að framleiða íslenskar vörur úr íslensku hráefni“ segir Pamela J Svavarson, markaðsstjóri Glófa sem framleiðir vörur sínar undir vörumerkinu  VARMA of Iceland.  

Starfsfólk Glófa er að mestum hluta konur, en ein af hverjum tíu konum greinist með krabbamein einhvern tímann á ævinni. „Þetta er málefni sem snertir allar konur, og því var ákveðið innan fyrirtækisins að skapa sérstaka línu í ár til stuðnings átaki Krabbameinsfélagsins gegn brjóstakrabbameini og renna 10% af söluhagnaði bleiku línunnar til Krabbameinsfélagsins. Með þessu viljum við leggja okkar af mörkum og styðja við bakið á því mikilvæga starfi sem unnið er á vegum Krabbameinsfélagsins fyrir konur og fjölskyldur þeirra um allt land,“ segir Pamela.

„Við kunnum vel að meta þann hlýhug og stuðning sem Glófi sýnir okkur með þessum gjörðum og hann skiptir miklu máli fyrir okkur,“ segir Guðrún Agnarsdóttir, forstjóri Krabbameinsfélags Íslands.  „Eins og Pamela minntist á þá kynnast flestir Íslendingar starfsemi Krabbameinsfélagsins á einhvern hátt, annað hvort persónulega eða í gegnum vini og ættingja. Þar skipta ekki síst sköpum þær tugþúsundir kvenna sem mæta reglulega til okkar í legháls- eða brjóstakrabbameinsleit. Átak Krabbameinsfélagsins er því átak okkar allra, eins og glöggt má sjá á hinum frábæru viðbrögðum sem við höfum fengið.“